Sou lobidjèl Primati a, Ministè Kondisyon Fanm ak Dwa Fanm (MCFDF) te òganize yon bèl dine ofisyèl pou onore Abigail Alexandre ak Ariana Milagro Lafond. De jèn fi sa yo te rive ranpòte laviktwa nan konkou Éloquencia ak House of Challenge, sa ki fè yo tounen de gwo anbasadris pou jènès peyi a. Minis J.E. Kathia Verdier te pwofite moman sa a pou voye yon gwo kout chapo pou talan ak rezilyans de jèn chanpyòn sa yo. Diskou Minis la te chaje ak sans patriyotik, kote li montre jan siksè sa a se yon viktwa pou tout Ayisyen. Ministè a ankouraje jèn yo pou yo pa janm sispann kwè nan fòs yo epi pou yo kontinye travay pou mete drapo Ayiti a byen wo sou tout sèn kote yo pase.
Selebrasyon sa a te sèvi tou kòm yon okazyon pou mande tout moun rete ini pou kore talan k ap pouse nan peyi a. Seremoni sa a se yon prèv ke Ayiti chaje ak jèn k ap travay di pou chanje figi peyi a atravè konesans ak entelidjans yo.
Leave a Reply