PÒTOPRENS / SEKIRITE] : OPERASYON LAPOLIS NAN SANT VIL LA, 5 BANDI TOUNEN KADAV ANBA BAL PNH

5 bandi ame pèdi lavi yo pandan yon gwo operasyon polis te mennen nan sant vil Pòtoprens

Nan apremidi dimanch 19 avril 2026. Entèvansyon sa a fèt nan kad efò otorite yo ap fè pou konbat ensekirite k ap vale teren nan kapital la.

Dapre enfòmasyon ki disponib, bandi yo te mouri pandan yo t ap fè echanj kout zam ak fòs lòd yo nan zòn mache Salomon, yon espas ki souvan okipe pa anpil aktivite komèsyal. Temwen yo fè konnen kout zam yo te entans pandan plizyè minit, sa ki te lakoz panik nan mitan rezidan yo ak machann ki nan zòn nan.

Sous nan lapolis fè konnen operasyon sa a te vize demantle yon selil gang ki t ap opere espesyalman nan ri Cameau ak nan ti ri Waag. Dapre menm sous la, gwoup sa a te souvan enplike nan zak kriminèl tankou vòl ame, kidnaping ak atak kont sivil yo.

Pandan operasyon an, fòs lòd yo te itilize plizyè mwayen taktik pou rive pran kontwòl sitiyasyon an. Omwen twa (3) eksplozyon dròn te tande, sa ki montre yon nouvo estrateji lapolis ap adopte pou fè fas ak gang ame yo. Eksplozyon sa yo te kontribye nan febli rezistans bandi yo, dapre enfòmasyon ki soti nan sous sekirite yo.

Jiskaprezan, otorite yo pa bay plis detay sou idantite bandi ki mouri yo ni sou kantite moun ki ta ka blese pandan entèvansyon an. Sepandan, lapolis anonse li rete detèmine pou kontinye operasyon kont gang ame yo nan plizyè katye nan kapital la.

Operasyon sa a montre volonte fòs lòd yo genyen pou reprann kontwòl teritwa yo epi redwi aktivite kriminèl yo nan Pòtoprens, nan yon moman kote popilasyon an ap viv anba gwo tansyon ak ensekirite.